अर्जुनी/मोर : नाशिक जिल्ह्यातील मालेगाव येथे दोन दिवसांपूर्वी 4 वर्षीय चिमुकलीवर 24 वर्षीय नराधमाने बलात्कार करून तिची निर्दयी हत्या केल्याच्या घटनेमुळे राज्यभर संताप व्यक्त होत आहे. या अमानुष प्रकाराचा तीव्र निषेध नोंदवत आज (20 ऑक्टोबर, गुरुवार) अखिल भारतीय आदिवासी विकास परिषदेच्या वतीने तहसीलदार अनिरुद्ध कांबळे यांच्या मार्फत मा. मुख्यमंत्री तथा गृहमंत्री देवेंद्र फडणवीस यांना निवेदन देण्यात आले.
निवेदन देताना शहर अध्यक्षा सौ. भुमेश्वरी मंगेश भलावी यांनी या घटनेमुळे व्यक्त झालेल्या वेदना आणि रोष व्यक्त करत सांगितले—
“4 वर्षांच्या चिमुकलीवर झालेला हा अत्याचार म्हणजे मानवतेलाच दिलेला धोका आहे. महिला आणि मुलींच्या सुरक्षेचा प्रश्न आता अत्यंत गंभीर पातळीवर आहे. आमची आदिवासी विकास परिषद कोणत्याही अत्याचारासमोर गप्प बसणारी नाही. समाजातील प्रत्येक बहिणी, प्रत्येक चिमुकली सुरक्षित राहावी—हीच आमची लढाई. अशा विकृत नराधमांना कठोरात कठोर शिक्षा, म्हणजे फाशीची शिक्षा झालीच पाहिजे; तेव्हाच भविष्यात अशा प्रकारांना आळा बसेल.”
शहर अध्यक्षा यांच्या या मनोगताला उपस्थित पदाधिकाऱ्यांनीही एकमुखी पाठिंबा देत आरोपीवर तातडीने कठोर कारवाई करण्याची मागणी केली. मृत चिमुकलीला न्याय मिळावा, पीडित कुटुंबाला मदत पोहोचावी आणि राज्यात महिला सुरक्षा यंत्रणा अधिक प्रभावी व्हावी, यावर परिषदेने ठाम भूमिका मांडली.
या प्रसंगी जिल्हा अध्यक्ष मंगेश पंचम भलावी, विदर्भ सहसचिव साहिल मडावी, तालुका सचिव कमलेश पंधरे, तालुका सदस्य किशोर पंधरे, घनश्याम पंधरे, हरिभाऊ नैताम, शरद शहारे, रामूजी कुंभरे आणि इतर पदाधिकारी उपस्थित होते.
