दिनकरनगर येथे नवनिर्माण ग्रा.पं. भवनाचे लोकार्पण
अर्जुनी मोरगाव ( सुरेंद्रकुमार ठवरे ) ग्रामपंचायत भवन हे केवळ कार्यालय नाही. तर गावाच्या विकासाचे आणि लोकशाहीच्या मूळ तत्वाचे प्रतीक आहे. येथे ग्रामसभा विकास आराखडे ,महिला बचत गट बैठक, युवक मंडळ चर्चा तसेच ग्राम स्वच्छता मोहीम यासारख्या उपक्रमाचे नियोजन होणार आहे. गावातील सर्व घटकांचा सहभाग वाढविण्याचे हे भवन नक्कीच उपयुक्त ठरेल, ग्रामपंचायत ही ग्रामीण विकासाचा केंद्रबिंदू संस्था आहे तिच्या बळकटीकरणासाठी भौतिक सुविधा तांत्रिक साधने आणि प्रशिक्षित कारभार आवश्यक आहे. आधुनिक आणि सुसज्ज इमारतीमुळे ग्रामपंचायतीचे काम अधिक कार्यक्षमतेने होईल आणि गावकऱ्यांना आवश्यक सेवा सहजतेने मिळतील त्यामुळे ग्रामविकासाच्या योजना आणि प्रशासनिक उपक्रमाचे अंमलबजावणी अधिक प्रभावी होईल असे प्रतिपादन गोंदिया जिल्हा परिषद चे अध्यक्ष लायक राम भेंडारकर यांनी केले.
तालुक्यातील दिनकरनगर येथील नवनिर्मित ग्रामपंचायत भवनाचे लोकार्पण जि.प.अध्यक्ष लायकराम भेंडारकर यांचे हस्ते ( ता.6 ) उत्साहात पार पडले.त्यावेळी लायकराम भेंडारकर बोलत होते.
नवीन ग्रामपंचायत भवन हे अत्याधुनिक सुविधांनी सुसज्ज असून प्रशस्त कार्यालयीन कक्ष, सभागृह, नोंदणी विभाग, तसेच ग्रामस्थांसाठी स्वतंत्र प्रतीक्षा कक्ष अशी सर्व सुविधा उपलब्ध आहेत. स्वच्छता, प्रकाश व्यवस्था आणि पिण्याच्या पाण्याची उत्तम सोय या नव्या इमारतीत करण्यात आली आहे. त्यामुळे प्रशासनिक कामकाजाची गती वाढून नागरिकांना आवश्यक सेवा एका छताखाली मिळणार आहेत.
लोकार्पण सोहळ्यास आम्रपाली डोंगरवार सभापती पं. स., संदीप कापगते उपसभापती, घनश्याम धामट पं.स. सदस्य, सुचित्रा शील सरपंच, पल्लवी वाडेकर गट विकास अधिकारी, सुबोध मजुमदार उपसरपंच, होमदास ब्राह्मणकर संचालक, कृ.उ.बा.स., बनमाली मंडल पो.पा., प्रधान सरकार अध्यक्ष, तंटामुक्त समिती, पाटणकरजी, सुनील सरदार माजी सरपंच, ए. सी. राणे व एल. एन. कुटे विस्तार अधिकारी, खोकण सरकार, रॉयजी, ललिता मंडल, भानुमती सरकार, मीरा मंडल, रिंकू सरकार, पवन पवार तसेच गावातील प्रतिष्ठित नागरिक, महिला बचत गट सदस्य आणि बालगोपाल प्रामुख्याने उपस्थित होते.
प्रास्ताविक सरपंच सौ.
सुचित्रा शील यांनी केले. त्यांनी ग्रामपंचायत भवन उभारणीच्या प्रवासाचा सविस्तर आढावा घेत सांगितले की, “हे भवन उभारणे हे सोपे काम नव्हते. परंतु लोकप्रतिनिधी व ग्रामस्थांच्या सहकार्यामुळे आणि प्रशासनाच्या मदतीने आज हे स्वप्न साकार झाले आहे. हे भवन सर्व ग्रामस्थांचे आहे आणि याच्या माध्यमातून गावाच्या सर्वांगीण प्रगतीचा नवा अध्याय सुरू होईल.”
संचालन गोपाल मंडल यांनी केले, तर आभारप्रदर्शन पवन पवार यांनी मानले. या नव्या ग्रामपंचायत भवनाच्या उद्घाटनाने दिनकरनगरच्या ग्रामविकासाच्या इतिहासात एक नवा अध्याय जोडला गेला आहे. प्रशासनिक सुविधा, नागरिक सेवा, आणि विकास योजनांच्या अंमलबजावणीला नवसंजीवनी मिळेल, असा विश्वास सर्व ग्रामस्थांनी व्यक्त केला.
